મૌન

જરૂર હોય છે

દુઃખ નહીં, પણ કંઇક ખટકતું જરૂર હોય છે,
હું શાંત, પણ દિલમાં કંઇક બળતું જરૂર હોય છે,
એકલતા, આમ તો નથી પજવતી મને મોટેભાગે,
પણ અમુક વખતે, બસ તારી જ, જરૂર હોય છે.

- બૈજુ જાની

ઘટમાં બે જણ

શ્રદ્ધા

બીજાની સામે જીતવું હોય તો કંઇક મેળવીને જીતાય છે,

પણ પોતાની સામે જીતવું હોય તો ઘણુંબધું છોડવું પડે.

પોતાની સાથે લડાઈ ચાલુ થાય ત્યારે ખબર પડે કે,

મેળવવા કરતાં છોડવામાં વધુ મહેનત લાગે છે.

- Baiju Jani

માણસને જરાં ખોતરો

માણસને જરાં ખોતરો, ને ખજાનો નીકળે,

સાચવીને  સંઘરેલો, એક જમાનો નીકળે.

મળે કશે આખી જિંદગી જીવતી દટાયેલી,

થાય બેઠી, બસ એક જણ પોતાનો નીકળે.

જરૂરી નથી કે સીધાં દેખાતાં જ સારાં હોય,

કદી કોઈ  અડીયલ  પણ, મજાનો નીકળે.

રખે માનશો,  હૈવાનીયત  હૈવાનો જ  કરે,

કદી, સજ્જનમાંથીય ઘણાં, શૈતાનો નીકળે.

ઘા, બધે જ મળે છે, ચાહે ગમે તેને ખોતરો

કદી  બહાર, કદી  અંદર, નિશાનો  નીકળે.

કંઈ જ નક્કી નહીં, આ તો માણસ કહેવાય,

બહારથી  પોતાનો, અંદર  બીજાનો નીકળે.

-     Baiju Jani

(૨૦/૫/૨૦૧૪)

માં

વૈશાખની બળબળતી બપોર,

ધગધગતો ફૂટપાથ,

વીજળીના થાંભલાની આજુબાજુ,

ત્રણ લાકડીઓ ગોઠવી,

એના ઉપર એક ફાટેલી સાડી બાંધી,

ઉભું કરેલું ...

એક ઘર.


આ દીવાલો વગરના ઘરની અંદરનું તાપમાન ,

બહારના તાપમાન કરતાં

ખાસ્સું નીચું હોય એવું લાગ્યું.


આ ઘરની અંદર,

ચારેક વર્ષનું બાળક,

સુતું છે...

નિરાંતે....

પોતાની માં ના ખોળામાં.

હા...આ એ જ માં...

જેણે આ ઘર,

ઉભું કર્યું છે,

અને પોતાના વાત્સલ્યથી,

એને વાતાનુકુલીત કર્યું છે.


-- Baiju Jani