માં

વૈશાખની બળબળતી બપોર,

ધગધગતો ફૂટપાથ,

વીજળીના થાંભલાની આજુબાજુ,

ત્રણ લાકડીઓ ગોઠવી,

એના ઉપર એક ફાટેલી સાડી બાંધી,

ઉભું કરેલું ...

એક ઘર.


આ દીવાલો વગરના ઘરની અંદરનું તાપમાન ,

બહારના તાપમાન કરતાં

ખાસ્સું નીચું હોય એવું લાગ્યું.


આ ઘરની અંદર,

ચારેક વર્ષનું બાળક,

સુતું છે...

નિરાંતે....

પોતાની માં ના ખોળામાં.

હા...આ એ જ માં...

જેણે આ ઘર,

ઉભું કર્યું છે,

અને પોતાના વાત્સલ્યથી,

એને વાતાનુકુલીત કર્યું છે.


-- Baiju Jani